Започнува судењето за трагичната несреќа кај Ласкарци
Објавено во: Македонија 01 Август, 2019
Обвинителниот акт од страна на Јавното обвинителство за автобуската несреќа кај Ласкарци е целосно прифатен од страна на Кривичниот суд и наскоро започнува судењето против шестемина обвинети кои се однесувале неодговорно пред да се случи трагедијата на патот Тетово - Скопје во која во февруари годинава загинаа 16-мина патници, а 37 беа тешко повредени.
Основното јавно обвинителство на 1 јули поднесе шест обвиненија поврзани со обвинети од „Дурмо турс“ за автобуската несреќа на патот Скопје - Тетово кај Ласкарци во која загинаа 16 патници и 38 се здобија со повреди. Уште од 2 јули минатата година сопственикот на претпријатието и шефот, кој патем не поседувал сертификат за професионална компетентност во патниот сообраќај, не го почитувале безбедносниот протокол пред да се преврти автобусот на 13 февруари 2019 и се обвинети за тешки дела против безбедноста на луѓето и имотот во сообраќајот
– Во однос на повеќе новинарски прашања за обвинителниот акт поврзан со сообраќајната несреќа која на 13 февруари 2019 година се случи кај селото Ласкарци, ја информираме јавноста дека советот за оценка на обвинителниот акт по разгледување и ценење на фактите и доказите приложени во актот, донесе решение со кое обвинението го одобри во целост – соопштија од Судот.
Преку АКМИС системот предметот ќе биде распределен на понатамошно постапување, а потоа ќе се закаже и датум за почеток на судскиот процес.