ЗАЕВ ЗА ГРАДОНАЧАЛНИКОТ НА ЛОЗОВО - оваа недела сигурно ќе реагирам, јас сум служител на сите граѓани
Објавено во: Македонија 18 Јануари, 2021
Премиерот Зоран Заев денеска упати сериозна порака до градоначалникот на Лозово, но и до другите градоначалници во земјава.
Тој порача до градските татковци да не му изигруваат локални шерифи и да им служат на граѓаните достоинствено.
Ова тој го одговори на новинарско прашање како ќе реагира на обвинувањата на вработени во општина Лозово кои се жалат на мобинг од страна на општинската управа.
„Првиот пат кога беа реакциите лично разговарав со градоначалникот и тој ми даде соодветно објаснување и корекции за одредени работи. Со новите настани не сум запознаен. Оваа недела сигурно дека ќе реагирам затоа што јас сум служител на нашите граѓани и сакам да бидат секогаш во нивна заштита. Граѓанин е и градоначалникот, но тој извршува сериозна одговорна функција како градоначалник на општина Лозово, не знам детали, не можам да инсинуирам што било, но дефинитивно ќе се заинтересирам за случајот и прва прилика ќе дадам коментар“, рече Заев.
Инаку, градоначалникот на Лозово во последниов период беше предмет на интерес на јавноста, по бројните поплаки за мобинг од вработени во општината, но и проблемот со наградната игра во општината.