Заев: Најбрзо има шанси да стигнат вакцините од Србија, утрово разговарав со Брнабиќ за да пуштат втора ургенција до Фајзер
Објавено во: Македонија 24 Јануари, 2021
Премиерот Зоран Заев утрово повтрно искомуницирал со премиерката на Србија, Ана Брнабиќ, околу пристигнувањето на вакцините од Србија кои ќе бидат потребни да се вакцинираат здравствените работници во ковид центрите, односно 8.750 вакцини.
„Тие пуштаат втора замолница и ургенција до Фајзер Њујорк, за да можат да ја дадат согласноста за да можат од Србија да се извезат вакцините кои се дадени за вакцинацијата“, рече Заев.
Ние како Влада, додава, ургираме исто така неколку пати преку нашето Министерство за здравство и тој верува дека тоа ќе биде одобрено.
„Посебно што ние некаде во февруари, некаде на средината или втората половина, очекуваме да стигнат и вакцините за кои имаме договор директно со Фајзер.
Уште еднаш напоменувам дека, покрај Ковакс системот, за кој очекуваме до крајот на неделата прецизен и директен одговор до кога да ги чекаме вакцините, очекуваме и од Европската комисија преку солидарната распределба одредени количини на вакцини. Така што очекуваме февруари директно да стигнат 5.850 вакцини, а потоа по 14.500 во наредните транши“, рече премиерот.
Но, навистина од Србија вакцините можат да стигнат најбргу, нагласи Заев, бидејчи, како што рече, сме подготвени.
Тие се сосема доволно за здравствените работници што работат во ковид центрите, тоа се 7.850 здравствени работници колку што беа наградени во декември.
„И навистина верувам дека колкави и да се значајни тие клаузули во договорите на Фајзер со Србија и со другите земји, можеме, во предвечерието на стигнувањето на нашите вакцини, да ни дадат согласност час поскоро да стигнат вакцините од Србија“, потенцира Заев.