Заев му се налути на Османи за координативното тело
Објавено во: Македонија 23 Јануари, 2019
Премиерот Зоран Заев индиректно порача дека му се лути на вицепремиерот за евроинтеграции Бујар Османи затоа што свика координативно владино тело за имплементација на Законот за употреба на јазиците само со министри од ДУИ, но не и од СДСМ и од другите коалициони партнери.
- Има криза заради тоа што некои политичари сакаат да се китат и со туѓи перја. Овој закон не е на ДУИ, овој закон е и на СДСМ, на Зоран Заев, на Беса, на сите што сме внатре, турска, пензионерска партија....Сите го поддржавме, сите го гласавме и мора да биде во духот на „Едно општество за сите“. Не ми требаат мене националими од ниедна страна, затоа што кога повикав да одработиме како партнерство за државата, една од работите за кои што се согласивме е да градиме едно општество за сите. Како што јас како Македонец внимавам на моите сограѓани Албанци, така и колегите Албанци треба да внимаваат на сограѓаните Македонци - рече Заев во синоќешното телевизиско гостување на Алсат.
Тој потврди дека и СДСМ ќе формира свое координативно тело затоа што Законот а употреба на јаиците бил и нивни производ. Покрај Османи, на координацијата присуствуваа и Министерот за образование, Арбер Адеми, пратеникот, Артан Груби, поранешниот министер за правда, Билен Салији, како и останати претставници на институциите и експерти. Потоа вицепремиерот изјави дополнително дека телото ќе се проширува со други функционери.
Заев додаде дека законот како стапен на сила ќе започне да се применува уште на следната владина седница.
- Секој министер Албанец ќе може да слуша превод со слушалки и ќе може да си го користи законското право да зборува на Албански. Веќе му дадов насоки на владиниот генерален секретар. За владините седници не се потребни посебни подготовки и подзаконски акти. Ние сме првите кои треба да дадеме пример - порача Заев.
На претходно прашање одговори дека не не наметнал меѓукоалиционен проблем одлуката на владата да го испрати законот на мислење во Венецијанската комисија, посебно за членот 8 за употребата на албанскиот јазик како службен на банкнотите и полициските униформи. Од ДУИ барале да не се избрува со оваа одлука или да се испратат само делови од законот, но премиерот инсистирал дека не треба да „се работи шверцерски со овој акт“.
- Мораме да видиме дали членот 8 е во согласност со европските прописи, бидејќи нашите службеници од бебедносните органи учествуваат и во задачи во странство, а исто така и националните банкноти циркулираат во странство - наведе Заев.
Инаку Османи во понеделникот ијави дека е против идејата за брзо испраќање на законот на мислење во Венецијанската комисија.