Заев: Мицкоски е квазипатриот, ние отвораме пат до ЕУ

Добивај вести на Viber

За две и полгодини отворивме 64.000 работни места, за четири години ќе отвориме 100.000, за да ги задржиме младите дома, порача лидерот на СДСМ, Зоран Заев на  трибината синоќа во Крива Паланка. 

„Пред неколку дена ЕУ ја отвори преговарачката рамка, а зошто токму на дестина дена пред изборите, па затоа што тоа нуди прогресивна политика, а тоа нека им биде јасно на квази-патриотите Мицковски, Јанушев и останатите. Тоа е прв официјален чекор дека македонскиот јазик ќе биде службен јазик во ЕУ, дека целото Европско законодавство ќе се преведе на македонски јазик, а нашиот јазик ќе биде достапен во европските библиотеки и ќе се изучува и во Рим, и во Виена, и во Берлин. Во септември-октомври пак, кога ќе ги отвориме поглавјата, како што ќе се затвораат кластерите, етапно ќе се отвораат фондовите, кои ќе ни бидат достапни како на сите земји-членки на ЕУ. Се тоа за нашите и ваши деца, за младите, за идните генерации, зашто сите не боли што се надвор, во туѓина. Тоа ќе го промениме, и вратите на НАТО и ЕУ што ги отворивме, нема да дозволиме да ни се затворат, нема назад во изолација, рече Заев пред кривопаланчани. 

Тој посочи дека за две и полгодини се зголемиле просечната и минималната плата, а порача дека во следниот мандат, просечната плата ќе достигне 34.000 денари, додека минималната ќе биде 20.000 денари.  На трибината говореше и Венко Филипче, претседател на комисијата за здравство на СДСМ, кој рече дека борбата со Ковид-19 покажала дека она што го правеле во изминатите две и полгодини, вложување во медицинскиот кадар, се покажало како клучно за одржлив здравствен систем. 

Во Крива Паланка со централниот караван на коалицијата „Можеме“ присуствуваа и заедничкиот носител во ИЕ 3, Јагода Шапхаска, како и кандидатите за пратеници во оваа изборна единица Маја Морачанин, Илија Николовски, Љупчо Балкоски.