Заев: Коморите ќе дадат предлог кој ќе го наследи Анѓушев
Објавено во: Економија 12 Ноември, 2019
Откако вицепремиерот за економски прашања Кочо Анѓушев најави заминување од политиката по предвремените парламентарни избори в година, премиерот Зоран Заев денеска на владината прес-конференција за буџетот рече дека стопанските комори повторно ќе предложат негова замена доколку Социјалдемократскиот сојуз успее да формира нова Влада.
- Тој е повикан од коморите за овој мандат и ќе разговараме за следниот мандат кој ќе биде од коморите. Прифаќањето на честа и одговорноста да биде вицепремиер и да се откаже е негово право. Тој менаџира со големи компании, добивката му е падната, ќе разговараме ако граѓаните ни ја дадат честа за нова Влада. Тој е одговорен политичар, рече Заев.
Анѓушев вчера во Топ Тема рече дека после изборите, без оглед на нивниот исход, ќе им се врати на своите компании и на Машинскиот факултет каде што предаваше.
„Кога прифатив да бидам дел од Владата моите намери беа најчесни, со знаењето што го имав стекнато, да и помогнам на државата. Но, за овој период приходите во моите компании опаднаа, а и профитите, некаде и до 50 отсто“, рече тој во студиото.