Заев и Рама рано по сабајле кај Вучиќ
Објавено во: Балкан 10 Октомври, 2019
Премиерот на Македонија, Зоран Заев, заедно со шефот на албанската Влада, Еди Рама, утрово од 9.00 часот му се гости на српскиот претседател Александар Вучиќ во Нови Сад. Разговорите ќе се водат во насока на идејата да се воспостави „мал Шенген“, најпрво помеѓу трите земји од Западен Балкан, а суштината би била слободен проток на стоки и луѓе.
Станува збор за еден вид на регионална „Царинска унија“ по примерот на ЕУ и без административни бариери. Засега оваа идеја нема голема поддршка кај меѓународната заедница, каде што преовладува мислењето дека прво треба да се решат меѓудржавните спорови, ниту пак кај коморите, кои бараат реформите за што побрз влез во ЕУ да бидат приоритет.
Заев вели дека добредојдена е секоја иницијатива што оди во насока на зајакнување на регионалната соработка, како критериум и во ЕУ агендата и што ја забрзува евроинтеграцијата на Западен Балкан.
„Утре со Претседателот на Србија Александар Вучиќ и со премиерот на Албанија Еди Рама ќе разговараме за тоа во Нови Сад. Имаме неискористен потенцијал за зголемување на регионалната соработка, интензивирање на трговијата, протокот на стоки, мобилноста на луѓе, услуги и капитал, меѓу сите земји од Западен Балкан“, објави Заев кој уште вчера пристигна во Нови Сад.