Заев денеска на средба со Орбан, Земан, Брнабиќ...
Објавено во: Македонија 12 Септември, 2019
Шефот на македонската Влада, Зоран Заев, денеска во еднодневна работна посета на Прага, Република Чешка, каде ќе учествува на Самитот на Вишеградската група и Западен Балкан.
Премиерите на Вишеградската група и земјите од Западен Балкан ќе се сретнат на Самитот во Прага. Тие беа поканети во Прашкиот замок од страна на премиерот Андреј Бабиш. Според Кабинетот на Владата, состанокот треба да ја зајакне соработката помеѓу двата региона и да се разговара и за прашањата на Европската унија и за заштитата на климата.
Програмата во Прага ќе започне со утринската сесија на претставници на Вишеград, на која присуствуваат премиерите на Словачка Петер Пелегрини, Унгарија Виктор Орбан и Полска Матеуш Моравјецки. Подоцна ќе се приклучат и претставниците на балканските влади.
Покрај Заев, од регионот ќе учествуваат уште и премиерите на Србија, Црна Гора, Албанија, Босна и Херцеговина. Меѓу гостите првично беше и вицепремиерот на Косово, но како одговор на изјавите на чешкиот претседател Милош Земан дека „ја сака Србија, но не и Косово“, се повлече од Самитот во прага.
Средбата во Прага треба да ја зајакне соработката меѓу двата региона, за што Чешката Република си ја постави целта во своето сегашно претседателство со Вишеградската група.