Вучиќ понудил решение за табличките, но Косовците не прифаќаат
Објавено во: Балкан 20 Септември, 2021
Повторно се напнати односите меѓу Србија и Косово.
Српскиот претседател Александар Вучиќ денеска понудил предлог решение за постигнување компромис во врска со новата ситуација на административните премини меѓу северно Косово и централна Србија, но албанската страна го одбила тој предлог.
Вучиќ денеска околу 18 часот треба да и се обрати на јавноста, пишуваат српските медиуми.
Министерството за внатрешни работи на Косово, заедно со косовската полиција, започнаа со акции за отстранување на српските регистарски таблички на сите премини за влез на Косово . Веста ја потврди косовското МВР во второто соопштение од утрово.
Косовскиот премиер Албин Курти во косовското собрание кажа дека сè додека граѓаните на Косово плаќаат за табличките кога ќе влезат во Србија, на сила ќе биде и обврската сите возила да ја имаат ознаката „РКС“.Портпаролот на ЕУ, Петер Стано, ги повика Белград и Приштина веднаш да ги намалат тензиите и да се воздржат од еднострани потези.
Тој додава дека специјалниот претставник на ЕУ, Мирослав Лајчак, моментално е во Белград, каде што ќе се сретне со претседателот на Србија, Александар Вучиќ, и дека Лајчак разговарал со политичките лидери во Косово за ситуацијата.