Втор ден избори во Македонија: Вчера првите 723 го дадоа својот глас
Објавено во: Македонија 14 Јули, 2020
Денеска е вториот ден од тридневниот процес на предвремените парламентарни избори во Македонија, на кој како избирачи продолжуваат да гласаат болните и изнемоштените лица.
Во домашни или болнички услови ќе гласаат уште 8.855 болни и изнемоштени лица. Биле пријавени 9.491 лице, но сите не ги исполнувале предвидените критериуми.
Вчера со гласањето на болните, позитивните и изолираните поради Ковид 19, заврши првиот изборен ден. Според последните информации на ДИК, се пријавиле 759, а гласале 723 лица.
Бројката била променлива во текот на денот бидејќи дел од приговорите биле уважени, а општинските комисии имале и дополнителни гласачи пријавени преку апликација. ДИК оцени дека гласањето се одвивало во исклучително тешките услови.
Од комисијата потсетуваат дека резултатите од гласањето ќе се знаат дури утре вечер, кога овие ливчиња ќе бидат изброени заедно со останатите.