Во Берлин состанок за железничкиот сообраќај помеѓу Србија и Косово

Добивај вести на Viber

По договорот на американскиот специјален претставник за дијалогот помеѓу Косово-Србија, Ричард Гренел со српскиот претседател Александар Вучиќ, денеска во Берлин ќе се одржат разговори за реконструкција на железничкиот, патнички и карго сообраќај меѓу Косово и јужна Србија, кој е во прекин повеќе од две децении .

Ќе се разговара само за комерцијални теми, бидејќи услов на Белград за продолжување на политичкиот дијалог, кој ќе продолжи да се спроведува под покровителство на Европската унија, е укинување на 100 процентните такси наметнати од Владата на Косово за увоз на стоки од Србија и Босна и Херцеговина, дознава Танјуг. .

Поврзувањето на инфраструктурата меѓу Србија и Косово беше една од главните теми на разговорите помеѓу Вучиќ и Гренел во Белград во петокот, кога американските дипломати објавија дека деталите за договорот за обнова на железничките услуги ќе бидат разгледани на состанокот во понеделникот во Берлин.

Гренел истакна дека САД сакаат двете страни да се фокусираат на економијата, работните места и просперитетот, како пат за нормализирање на односите.

Во изјавата за американската новинска агенција АП, Гренел, кој истовремено е и американски амбасадор во Германија, рече дека договорот за обнова на железничкиот сообраќај меѓу Србија и Косово ќе биде важен за обете страни.

Воспоставувањето железнички врски, рече тој, стана приоритет откако американските власти посредуваа минатата недела во постигнувањето на договор за повторно воспоставување на воздушниот сообраќај меѓу Белград и Приштина по 21 година.