ВО АВТОБУС ВО ГЕРМАНИЈА ИМАЛО ЗАЛОЖНИЧКА ДРАМА - уапсен и испрашуван бил српски државјанин

Добивај вести на Viber

Српскиот државјанин (30), кој беше уапсен синоќа во Германија под сомнение дека држел заложници во автобусот на „Ласта“, бил испрашуван во текот на ноќта, потврди утрово полицијата.

Засега не е познато што тој рекол на сослушувањето, ниту каква е неговата психичка или физичка состојба.

Србинот бил уапсен по четиричасовна блокада на автопатот помеѓу Хилполштајн и Грединг, бидејќи, како што се сомнева, зел како заложници тројца возачи. Претходно, во автобусот, кој патувал за Србија, дошло до тепачка во која полесно биле повредени еден маж и една жена. Според медиумите, поради конфликтот, автобусот застанал во коловозната лента на автопатот, по што пристигнала пријава дека во возилото има вооружен маж.

„Човекот во автобусот тврдеше дека има пиштол и дека ќе ги убие сите. Имаше физичка пресметка помеѓу неколку патници и двајца беа полесно повредени“, објави полицијата доцна синоќа, како што објави Телеграф.

Откако го запреле возилото, патниците успеале да избегаат од автобусот, а тројцата возачи и осомничените останале внатре. 

Полицијата потоа го блокирала автопатот и испратила специјални единици на местото на настанот за да преговараат со осомничениот. Медиумите пренесуваат дека преговорите биле тешки бидејќи речиси никој од луѓето што биле во автобусот не знаел германски.

Извор: Блиц.рс