ВМРО-НП по посетата на лидерот Георгиевски во Бугарија: Да се интензивира темпото за да не дојде до вето

Добивај вести на Viber

ВМРО-НП, партијата на Љубчо Георгиевски која е дел од владеачката коалиција „Можеме“, по посетата на нивниот лидер во Бугарија, соопшти дека треба да се интензивира темпото на спроведување на Договорот за добрососедство за да не дојде до вето на почетокот на најавените преговори на Македонија со ЕУ до крајот на годината.

„Од страна на соговорниците беше потенцирано дека тие не бараат нова промена на Уставот на Македонија, дека не бараат нов посебен договор, но инсистираат на спроведување со јасно темпо на досега договореното помеѓу двете држави, со посебен акцент на историската комисија.

Притоа на крајот се заклучи дека во наредниот период ќе се интензивира работата за да не дојде до ставање вето на патот на Македонија кон Европската унија“, гласи заклучокот на ВМРО-НП по посетата на поранешниот македонски премиер во Софија.

Георгиевски, при својата посета во соседна Бугарија оствари средби со министерката за надворешни работи, Екатерина Захариева, со потпретседателот на Владата и министер за одбрана, Красимир Каракачанов и со генералниот секретар во кабинетот на престедателот Румен Радев, Димитар Стојанов, а притоа имаше интервјуа и настапи за повеќе медиуми.

„Господинот Георгиевски се обиде да го објасни неговото мислење и позиција дека сепак во македонско-бугарските односи има напредок и стави посебен акцент на работата на заедничката историска комисија која и покрај тоа што можеби не работи со идеално темпо, сепак има направено големо поместување напред што треба да биде позитивно оценето од страна на нашите соседи“, се вели претходно во соопштението на партијата.