ВМРО-ДПМНЕ ќе им „стегне“ кривични на Џафери и Костовски за Законот за јазици
Објавено во: Македонија 15 Јануари, 2019
Опозицијата против две лица ќе поднесе кривични пријави за Законот за јазици.
Oд ВМРО ДПМНЕ најавија дека ќе поднесат кривична пријава против претседателот на Собранието, Талат Џафери и директорот на Службен весник, Мартин Костовски.
Од партијата велат дека објавувањето на Законот за јазици во Службен весник и Законот за ратификација на спогодбата од Преспа, без потпис на претседателот на државата, Ѓорѓе Иванов, а со потпис на Џафери е противуставно. ВМРО-ДПМНЕ бараат Уставниот суд да пресече и оцени дали објавувањето на законот за јазици е според Уставот. Повикуваат и на бојкот на законот.
„Овој закон е уште една хипотека преку која Заев се обидува да ја плати цената за неговото доаѓање на власт и затоа ваквото однесување на СДСМ и ДУИ е срамно и неприфатливо. ВМРО – ДПМНЕ ги повикува сите институции на централно и локално ниво да го игнорираат и бојкотираат операционализирањето на овој неуставен и штетен закон. Доколку одговорните во институциите се соочат со какви било проблеми или закани, ВМРО – ДПМНЕ и правната комисија им стојат на располагање за правна или било каква друга помош. Власта нема легитимитет за промената на името и спроведување на законот за двојазичност. Граѓаните не го дадоа својот глас за Зоран Заев да се пазари со државата и националните интереси. Со секој поминат ден со СДСМ на власт штетите по Македонија се огромни“, изјави Игор Јанушев од ВМРО-ДПМНЕ.
Слична реакција имаше и претседателот Иванов. Тој смета дека со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење.
Вели дека ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото.
Законот за јазици синоќа излезе во Службен весник.