ВМРО-ДПМНЕ бара Владата да исплаќа половина бруто-плата на засегнатите работници и да се купуваат македонски производи
Објавено во: Економија 20 Март, 2020
ВМРО-ДПМНЕ денеска во една од предожените мерки побара Владата да ги исплаќа половина од бруто-платите на вработените во загрозените дејности кога ситуацијата со корона вирусот е критична. Антонијо Милошоски рече дека најголемата опозициска партија е свесна дека ова барање бара од државата да обезбеди многу пари, но и дека истовремено не е невозможно да се спроведе.
„ Да се замрзнат обврските на компаниите кон банките и да не ги плаќаат обврските кон државата, Владата да ги сторнира каматите по однос на компаниите за месец март, а и за месец април ако е потребно. Да се исплаќаат трошоците на вработените во висина од 50 отсто од бруто-платата кај погодените бизниси. Знаеме дека овој план изискува многу средства, но ако не, понатаму ќе има многу потешки последици. Субвенции од страна на држабвата ќе бидат потребни и за подоцна. Тоа е за малите, средни и големи да ја задржат дејноста и да не стават клуч. Ако Владата ги одржи во живот, тогаш после кризата тие ќе можат да и помогнат. Ова се добронамерни мерки, а ја повикуваме вицепремиерката Мила Царовска и министерката за финансии Нина Ангеловска да ги посетат фабриките во слободните економски зони кои изработуваат автомобилски делови и да видат непосредно што им е потребно, рече Милошоски на денешната прес-конференција пред седиштетео на ВМРО-ДПМНЕ.
И лидерот Христијан Мицкоски во своето последно интервју рече дека државата може да исплати половина бруто-плата на работниците во засегнатите сектори во приватниот бизнис.
- Мора да им покаже на сопствениците на бизнисот дека стои зад нив, и дека е подготвена да сноси половина од бруто трошоците за вработените, изјави Мицкоски.
Претседателот на ВМРО-ДПМНЕ побара ново задолжување на државата на странските финансиски пазари и да ја активира еврообврзницата од 400 милиони евра и да се интервенира во државните резерви кои бројат три милијарди евра.
Генералниот секретар Игор Јанушев во меѓувреме побара од граѓаните да бидат солидарни и да купуваат македонски производи.
„Но, ако владата молчи, сите ние можеме да помогнеме. Купувајте македонски производи за да спасиме работни места, само така можеме да си помогнеме себе си, и на останатите, затоа што ја сакаме Македонија!“, напиша денеска Јанушев на Фејсбук.
Слична порака ден претходно упати Милошоски.„Корона-кризата се заканува да И нанесе здравствена, но и голема стопанска штета на Македонија. Затоа во овој кризен период, но и потоа КУПУВАЈТЕ МАКЕДОНСКИ ПРОИЗВОДИ! Да им помогнеме и како поединци на нашите домашни производители, даватели на услуги, фабрики, мали стопанственици и средни претпријатија. Македонската економија е еден од столбовите на стабилноста на државата!“, објави Милошоски.