Владата ќе набавува централа што ќе произведува струја од дизел
Објавено во: Економија 28 Септември, 2022
Владата на една од последните седници донела одлука за набавка на централа која работи на дизел гориво и со можност од 25 мегавати треба да произведува електрична енергија.
Виктор Андонов, советникот за енергетика на Владата, на денешната прес-конференција на прашање испратено од „Фактор“ потврди дека АД ЕСМ е задолжен да ја спроведе набавката.
- Пристигнуваат најразлични понуди за зголемување на домашното производство на електрична енергија. Иницијативата е да се зголеми производството преку такви постројки, бидејќи постојат такви кои може да се инсталираат многу брзо. ЕСМ е задолжена да ги направи сите потребни економски и технички анализи и да презентира пред Владата кои се опциите за набавката на конкретната електрана. Веднаш по изработката на сите податоци, јавноста ќе биде информирана за деталите, рече Андонов.
Според претходните најави на Зоран Димитровски, заменик-министерот за локална самоуправа, централата би била мобилна и трошоците за работа би биле прифатливи.
А.К.