Вилма Русковска со писмо ја појасни својата СМС порака која крена прашина
Објавено во: Македонија 22 Ноември, 2019
Обвинителката од ОЈО за гонење на организиран криминал и корупција Вилма Русковска, испратила писменото образложение за нејзината СМС порака која е топ тема деновиве.
Русковска денеска испратила писмо до Основното јавно обвинителство и до Советот на јавни обвинители, а во врска со СМС пораката што завчера предизвика бура во судските кругови, а која била упатена до еден од тројцата судии во Апелацискиот суд кои одлучувале за куќниот притвор на поранешната специјална јавна обвинителка, Катица Јанева, осомничена во „Рекет“.
Членовите на Советот на јавните обвинители сметаат дека не се надлежни да го оценуваат случајот со заканувачката СМС порака која обвинителката Русковска ја испратила до Јани Нича, еден од судиите кои одлучија да ја пуштат поранешната специјална јавна обвинителка, Јанева во домашен притвор.
Пораката на Русковска дека ќе отвори финансиска истрага против судиите кои одлучија Jанева, да замине во домашен притвор била испратена до судијата Јани Нича. Откако судиите ја објавија јавно содржината, ја обвинија Русковска дека им се меша во работата, односно врши притисок со што се нарушува угледот на судиите.
Претходно, министерката за правда, Рената Дескоска, смета дека фамозната СМС-порака на обвинителката која ја испрати до еден од членовите на Кривичниот совет на Апелациониот суд Скопје е суштински јасна, без разлика во каков стил е напишана.