(ВИДЕО) Воена парада во Париз, но и апсење на „Жолтите елеци“
Објавено во: Свет 14 Јули, 2019
Уапсени се 152 лица за време на воената парада во Париз.
Францускиот претседател Емануел Макрон за време на неговото појавување на Шанзелизе во командниот воен автомобил, беше исвиркан од „Жолтите елеци” присутни на познатата авенија. Потоа почнаа тензиите меѓу демонстрантите и полицијата, при што 152 лица беа уапсени, јави дописникот на МИА.
На маргините на одбележувањето на францускиот национален празник, во Париз избија судири меѓу „Жолтите елеци” и полицијата на авенијата Шанзелизе, кратко време по завршувањето на воената парада по повод Денот на падот на Бастилја.
За време на судирите е употребен и солзавец, а потоа следеле и апсењата. „Жолтите елеци” се обидувале да се искачат на барикадите и да ја окупираат авенијата Шанзлизе.
Уапсените се наоѓаат во притвор поради „организирање нелегални протести, соопшти канцеларијата на парискиот обвинител.
На свеченото дефиле на армијата на Франција пред Елисејските полиња покрај домаќинот францускиот претседател Емануел Макрон присуствуваа и германската канцеларка Ангела Меркел, генералниот секретар на НАТО Јенс Столтенберг, претседателот во заминување на Европската комисија Жан Клод Јункер, британскиот вицепремиер Дејвид Лајдингтон и други угледни гости.