(ВИДЕО) УАПСЕНИ МАЖ И ЖЕНА: Oсомничени се дека ги шверцувале 39-те луѓе кои во камион се најдени мртви
Објавено во: Свет 25 Октомври, 2019
Уапсени се жена и маж од Англија откако во камион беа најдени 39 мртви луѓе, за кои се испостави дека се кинески државјани.
Уапсените се на возраст од 38 години, а уапсени се во Ворингтон на северозападот на Англија, под сомнеж дека учествувале во заговор за шверцување луѓе.
25-годишниот возач на камионот, кој е од Северна Ирска, е во притвор и е осомничен за убиствата.
Возачот на камионот е уапсен дента кога беа откриени 39-те тела во камионот ладилник. Тој е сѐ уште во притвор, а полицијата доби дополнителни 24 часа за негово испрашување.
Во понеделникот почна обдукција на телата, а се работи и на нивна идентификација.
Вчера и денес полицијата прави претреси на куќи во градот на камионџијата во Северна Ирска. Полицијата претходно денес соопшти и дека истражува три члена на банда вмешана во шверц на луѓе.
Дали двајцата уапсени се дел од таа банда сѐ уште не се знае, затоа што полицијата ги објави само нивните возраст и пол.
Бугарските медиуми, пак, јавија дека 38-годишната Џоана Махер од Ворингтон, е сопственичка на камионот „сканија“.
Таа и нејзиниот сопруг Томас, биле сопственици на камионот, но рекле дека го продале на една компанија пред 13 месеци.
Меѓу жртвите имало 8 жени и 31 маж. Се работи за 38 возрасни лица и еден тинејџер.Кина побара од Британија „строго да ги казни“ одговорните за смртта на тие луѓе.