(ВИДЕО) Радев се сретна со бугарските историчари: Ако не гарантирате промена на ставот кај Македонците, Бугарија ќе изгради нова позиција
Објавено во: Балкан 19 Септември, 2019
Претседателот на Бугарија, Румен Радев се сретна со бугарските претставници од Мешовитата мултидисциплинарна експертска комисија за историски образовни прашања и им порача дека следните месец дена ќе бидат клучни во преговорите со експертите од македонската страна. Тој им напомена дека Македонија на средината на следниот месец се очекува да добие Датум за преговори а до тогаш треба да бидат изградени ставовите на двете страни од комисијата или во спротивно ќе побара од бугарскиот парламент да ја промени позицијата кон Македонија и да направи нова стратегија.
- Ако можете да гарантирате дека во рамките на следниот месец ќе се решат сите спорови околу настаните, личностите, учебниците, натписите во музеите и спомен-плочите, бугарската Влада нека продолжи со политиката на безусловна поддршка на членството на Македонија во Европската унија, рече Радев.
Шефот на државата зацрта дека ако таква гаранција не може да биде дадена, ќе иницира превземање на мерки за изработување на нова национална позиција „со јасни очекувања и критериуми за заштита на бугарскиот национален интерес кои треба да се наметнат во преговарачката рамка со Република Северна Македонија“.
- Сакам да нагласам дека Бугарија треба да продолжи да ја поткрепува евроинтеграцијата на Македонија. Од секогаш сум настојувал ние да бидеме најактивните застапници на таа кауза, но при јасни услови, додаде Радев на средбата со членовите од комисијата предводена од Ангел Димитров.
Претставниците на Комисијата го запознаа бугарскиот претседател со постигнатото до моментов, како и со предизвиците што претстојат, додека Радев подвлече дека евроинтеграцијата на Македонија не треба да биде на сметка на бугарската историја, јазик и идентитет.