(ВИДЕО) По скоро девет децении молитва во Аја Софија, Грција реагира
Објавено во: Балкан 24 Јули, 2020
По скоро девет децении се одржа молитва во Аја Софија, која повеќе не е музеј, туку џамија.
По 86 години Аја Софија повторно е отворена за молитва. Турскиот суд, на 10-ти јули ја поништи одлуката донесена во 1934 од некогашната Влада на таа земја дека тоа е музеј.
Турскиот претседател Реџеп Таип Ердоган им се придружи денес на илјадниците верници кои се собраа околу Аја Софија.
Првата молитва во Света Софија или Аја Софија, како што е позната во Турција, на која денеска присуствуваа илјадници верници откако ѝ беше вратен статусот од музеј во џамија, предизвика остри реакции во Грција, јави дописничката на МИА.
Грчкиот премиер Кирјакос Мицотакис во видеопорака до граѓаните по повод 46-годишнината од враќањето на демократија во Грција се осврна и на односите со Турција, коментирајќи дека со постапки како што е претворањето на Света Софија во џамија, Турција „ја навредува културата на 21 век“.
Во Грција и на Кипар по повод денешната прва муслиманската молитва во базиликата Аја Софија во Истанбул, црквите ѕвонат во знак на протест и знамињата се спуштени на половина копје, а патријархот на православната црква ќе служи специјална миса денес попладне.