Верушевски: Никола Груевски имаше патолошка желба да ја задржи власта по секоја цена
Објавено во: Македонија 10 Октомври, 2019
Поранешниот разузнавач Зоран Верушевски на денешното судско рочиште во предметот „Таргет Тврдина“ алудираше на тоа дека поранешниот премиер Никола Груевски бил тој кој му наложувал на поранешниот директор на УБК, Сашо Мијалков, да се прислушкува бидејќи, како што вели тој, имал „патолошка желба да ја задржи власта по секоја цена“, пренесува „Фокус“.
Актуелниот советник за безбедност на премиерот Зоран Заев на судење продолжи да одговара на прашања на Обвинителството поврзани со нелегалното прислушување во УБК. Како што пренесува „Фокус“, Верушевски смета дека мозокот на нелегалното прислушување е Груевски во овој случај.
-СЈО во овој предмет направи курцијално поместување на лицето кое требаше да биде првообвинето, а сега е во бегство во Унгарија. Суштината на оваа документација е дека е креирана од тој што имал најголем бенефит. Клучна е амбицијата на тоа лице кое ја имал таа патолошка желба да ја задржи власта по секоја цена, рече Верушевски.
Верушевски смета дека приказната би била многу подруга доколку обвинетите Горан Грујевски и Никола Бошковски се достапни на органите на прогонот,
-Сериозен пропуст на СЈО е што не го обезбеди овој човек во судница, но и во државата. Со нетрпение ја чекам разврската на истрагата за бегството на Груевски. Убеден сум доколку имам моќ да ги повикам двајцата бегалци од Грција, тогаш ќе ја добиеме целината за овој случај, наведе Верушевски.