Уште седум ново инфицирани со Ковид-19 во Куманово
Објавено во: Македонија, Корона Вирус 04 Април, 2020
Во Куманово има уште седум нови инфицирани пациенти со Ковид-19, но меѓу нив нема ниту медицинско лице, велат од Центарот за јавно здравје на Куманово, за разлика од вчера кога беа регистрирани дури 11 на инфективното одделение во кумановската болница.
Инаку, општинскиот штаб за заштита и спасување на Куманово денеска уште еднаш упати апел до своите граѓани при појава на какви било симптоми, кои можат да укажат на инфекција со корона вирус, веднаш да го исконтактираат својот матичен лекар и доколку бидат упатат до болница да не одбиваат хоспитализација ако тоа им е препорачано од дежурниот лекар.
Дежурен телефон на Општинскиот штаб за заштита и спасување е 078 365 061, на кој граѓаните ќе можат да ги добиваат потребните информации, информираат од таму. Апелираат повеќе аптеки во градот да воведат деѓурства, бидејќи во моментов отворена е само Провиталис и нејзиниот телефонски број е 031 415 303.
Бараат од Владата да биде донесена мерка со која маркетите и продавниците ќе можат телефонски и онлајн да вршат продажба на прехранбени продукти и диструбуција до купувачите на домашна адреса во деновите кога трае целодневниот полициски час.