УШТЕ СЕ ТРАГА ПО ЛУЃЕТО: Шест луѓе загинаа при ерупцијата на Нов Зеланд
Објавено во: Свет 10 Декември, 2019
Не е конечен бројот на жртви од ерупцијата на вулканот во Нов Зеланд.
Премиерката Џасинда Ардерн, денеска изјави дека големината на трагедијата од вчерашната ерупција на вулканот е катастрофална, а полицијата започна истрага за случајот.
Уште едно лице починало денес по ерупција на вулканот на островот Вајт. Тоа е едно од повредените лица кое беше во болница. Сега, официјално, шест луѓе загинаа во оваа ерупција.
Од 47 луѓе кои биле во близина на островот за време на ерупцијата, шестмина загинале, а 30 се повредени. Полицијата соопшти дека има уште осум лица на островот за кои се верува дека исчезнале.
При ерупцијата имало 24 австралиски туристи на островот, деветмина Американци, пет туристи од Нов Зеланд, четворица од Германија, двајца од Кина, двајца од Велика Британија и еден од Малезија.
Портпаролот на Министерството за здравство Пит Вотсон за медиумите изјави дека е можно да не преживеат сите пациенти. Дваесет и седум лица претрпеле изгореници на повеќе од 30 проценти од површината на телото и „околу дваесет“ се во критична состојба, рече тој.
Меѓу повредените и исчезнатите имало државјани на Австралија, САД, Велика Британија, Кина, Германија, Малезија и Нов Зеланд.
По ерупцијата, на Нов Зеланд имаше земјотрес.
Утре се очекува нова ерупција на вулканот.