Уште еден протест против поскапувањето на струјата, Чаир повикува учесници и од другите населби во Скопје
Објавено во: Економија 12 Август, 2020
Во Чаир в петок ќе се одржи уште еден протест против поскапувањето на струјата, односно измената на тарифите што ја одобри Регулаторната комисија за енергетика на барање на МЕПСО, ЕСМ и ЕВН.
Овој пат организаторот бара на протестот да се приклучат и граѓани од другите населби во Скопје и да се пријават нивните лидери во советот на протестот на граѓанската иницијатива.
„Бараме доброволци од сите населени места во Скопје и околина да се пријават во советот на протестот за да заедно организираме и што повеќе да ја мобилизараме масата за масовен протест. Доброволците треба да се јават, да ги остават своите лични податоци како и населеното место и контакт телефонот“, се вели во најавата за протестот.
Незадоволството од зголемувањето на цената за 7,5 отсто ќе се одржи задутре со почеток од 18 часот, во паркот во скопски Чаир.
Од паркот во Чаир ќе се маршира до Влада.