УНИ Банка здраво гази, растат нето приходите од камати и надоместоци
Објавено во: Економија 28 Февруари, 2020
Добри вести за акционерите на УНИ Банка. Растат нето приходите од камати и нето приходите од провизии и надоместоци во услови кога генерално се намалуваат каматните стапки. Нивната банка држи ниво и пазарна позиција и покрај тоа што има благо намалување на добивката во споредба со претходната година
УНИ Банка лани остварила добивка од 4,12 милиони евра и успеала да ги зголеми нето приходите од камати и нето приходите од провизии и надоместоци лани во споредба со 2018 година, покажуваат официјалните податоци објавени на интернет страницата на Македонската берза за хартии од вредност.
Нето приходите од камати за лани изнесуваат 12,85 милиони евра и се за 708.000 евра повисоки од 2018 година. Сличен е трендот и кај нето приходите од провизии и надоместоци. До крајот на 2019 година тие достигнале ниво од 2,72 милиони евра и во споредба со истиот период 2018 година се повисоки за половина милион евра. Останатите приходи од дејноста на банката се за нијанса подобри од 2018 година. Тие изнесуваат 569.000 евра.
Ова покажува дека на приходната страна менамџментот лани ги исполнил таргетите во смисла на тоа дека имаат подобри резултати од претходната година во услови кога паѓаат генерално каматните стапки за кредити и за депозити.
Кај расходите многу голем раст на резервациите за кредитните пласмани. Нивото на резервации заклучно со крајот на декември лани е 2,75 милиони евра наспроти 2018 година кога нивото било 924.000 евра. Значајно зголемување има и кај трошоците за вработените. Тие надминаа 5,4 милиони евра и во спроедба со претходната година пораснале за 677.000 евра.
Добивката на банката лани изнесува 4,12 милиони евра и е за 247.000 евра пониска од 2018 година.
На страната на билансот на состојба работите стојат вака: огромен раст на кредитите на други коминтенти (н.з. сите фирми освен банките). Тие се зголемени за 38 милиони евра и на крајот на 2019 година изнесуваат 266,33 милиони евра. Вложувањата во хартии од вредност пораснале за повеќе од 10 пати и тоа од 213.000 евра на 2,2 милиони евра. Вредноста на депозитите на други коминтенти надмина 297,4 милиони евра и бележи раст за 27,9 милиони евра.