УЈП: ВМРО-ДПМНЕ не платилa близу 23 милиони денари кон „Полиестердеј“
Објавено во: Македонија 11 Декември, 2019
Координатор на инспекцијата на УЈП за големи даночни обврзници денеска пред медиумите брифираше дека ВМРО-ДПМНЕ не платила 22.852.816 денари кон фирмата „Полиестердеј“, која пак рекламниот материјал за последната изборна кампања го набавувал од фирмата „Монт“.
Во меѓувреме сметките се затворени, бидејќи тие траат само 60 дена, според изборниот законик.
Според тоа, неколку фактури за отпечатени запалки, кеси, маици и други реквизити останале неплатени.
„Полиестердеј“ му останал должен на „Монт“ за 20.200.689 денари, а само до септември уплатил три милиони денари на сметката на фирма од Шпанија, под име „Горд Фактори“, која исто така изработувала реквизити за опозициската партија
Кај ВМРО-ДПМНЕ се испратени седум фактури, во вредност од 34.362.612 денари, за милиони капчиња, маици и други материјали.
Иако рокот за исплата требало да заврши во јуни, партијата до 9 август платила само 11.509.796 денари кај „Полиестердеј“, а неплатеното салдо е 22.852.816 денари.
Целата документација ќе биде предадена во Антикорупциска комисија и Заводот за ревизија, а веќе имало состанок со надлежните од МВР.
Од УЈП велат дека нивните наоди покажуваат дека целиот случај е недозволива донација од страна на „Монт“, која преку „Полиестердеј“, заедно со шпанската фирма ги изработувале материјалите.
А.К.