Угостителите го селат протестот пред Влада

Добивај вести на Viber

Угостителите и индустријата за организирање на свадби и други настани по три дена протести со блокада на крстосницата во скопска Автокоманда, денеска своето незадоволство ќе го искажат во 15.00 часот пред Владата.

Тие се незадоволни од рестриктивните мерки кои го лимитираат нивното работење, како и финансиската помош која во моментов им се нуди, бидејќи како што велат, таа е недоволна за основно функционирање. Велат дека ќе останат таму се додека не се усвојат нивните барања, за кои Владата до сега немаше слух.

Целта на овој протест е да се донесат протоколи за работа на рестораните за организирани настани. Да се вратат во функција сите комплементарни дејности (музичари, фоторафи, ателјеа за венчаници, студиа за декорации, слаткарници, цвеќари, шминкери, креатори). Забраната трае, а ние се уште чекаме протокол за работа веќе една година. Протестот ќе биде мирен со почитување на сите здравствени протоколи, бараат од таму.

Вицепремиерот за економски прашања Фатмир Битиќи денеска на прес-конференцијата  рече дека оваа дејност е опфатена во сите мерки и дека е подготвен да седне да разговара повторно, но дека нема храброст да побара од Комисијата за заразни болести да попушти во рестрикциите.