Тони Трајковски ги излечи повредите, конечно се појави на суд

Добивај вести на Viber

Тони Трајковски, поранешниот градоначалник на Гази Баба, конечно се појави на судење за случајот „ТНТ“ за насилното уривање на „Космос“ откако претходно во неколку наврати обвинетиот не беше присутен на неколку рочишта во низа, а во меѓувреме имаше препукување со закани помеѓу Кривичниот суд и неговиот адвокат, при што оставка си поднесе една поротничка.

Минатиот месец Трајковски не дојде на судењата откако прво пријави дека бил претепан од непознати и засега неоткриени лица, а потоа и дека се лекува од повредите во Клиничкиот центар. Не дојде ниту вчера, откако судскиот курир не го нашол дома за да му ја достави поканата, по што судијата Огнен Ставрев го предупреди дека за денеска ќе биде доведен со полиција доколку не се појави.

Во меѓу време во овој предмет оставка поднесе поротничката Лилјана Ивановска Кочковска и на нејзино место беше назначена нова поротничка и уште еден резервен, а процесот започна од почеток.

“ТНТ” започна пред две години и сега повторно е на самиот почеток. Обвинети се и поранешниот министер за транспорт и врски Миле Јанакиески и поранешниот премиер Никола Груевски, кому му се суди во отсуство.