То Вима: Извонредна енергетска соработка помеѓу Атина и Скопје
Објавено во: Економија 15 Јануари, 2021
Грчката „То Вима“ во денешното издание пишува за извонредната раздвиженост во енергетскиот сектор по потпишувањето на Договорот од Преспа помеѓу Грција и Македонија.
Весникот пишува дека за време на неодамнешната посета на премиерот Зоран Заев на Атина, во средината на септември беше изразен интерес за учество на Северна Македонија во изградбата на терминалот за течен природен гас во Александрополис, проект во кој учеството на Бугарија е веќе договорено.
„Поврзувањето на Северна Македонија со гасоводот ТАП и нејзиниот интерес за учество на терминалот за течен природен гас во Александрополис значително ќе ја намалат зависноста на Северна Македонија од рускиот гас, зголемувајќи ја нејзината енергетска безбедност, истовремено зајакнувајќи ја својата позиција и на Грција во толку важна геополитички, енергетска мапа на регионот. Големите компании, како што се ИПТО и ДЕСФА, бараат, во суштина, поддршка за надградба на енергетската интерконекција помеѓу двете земји. Истото важи и за ЕЛПЕ, која има „стратешки важна“ позиција на пазарот на енергија во Северна Македонија“, пишува То Вима.
Се додава дека особено ЕЛПЕ чека на повторно отворање на нафтоводот што го поврзува Солун со Скопје, кој запре во 2013 година, предизвикувајќи значителна финансиска штета и доведе до правен спор меѓу ЕЛПЕ и Македонија.
„Треба да се продолжи со надградбата на енергетската соработка меѓу Грција и Северна Македонија бидејќи има значителни придобивки за двете земји“, констатира весникот.
Заев во своето последно интервју вели дека анализите покажуваат дека можеме да инвестираме во гасните терминал и централа во Александрополис за да имаме сопствеништво на меѓународен гасен терминал и гасна централа со локација во Грција.
Тој додаде дека оваа инвестиција обезбедува „букирање” на капацитети за сигурно и стабилно снабдување на земјата со гас, без ризици. Изградбата на Интерконекторот со Грција е проект вреден 54 милиони евра, од кои 14 милиони се грант од инвестициската рамка за Западен Балкан.
Премиерот Заев оцени дека Владата следејќи ја состојбата во што најмногу се вложува во светот, се посветува на проектите од областа на енергетиката и енергетската ефикасност, заедно со дигитализацијата и сите други високи современи технологии, кои обезбедуваат економски напредок.