ТЕНЗИИ ВО БЕЈРУТ: На протестите се повредени неколку луѓе

Добивај вести на Viber

Безбедносните сили испалиле солзавец кон антивладините демонстранти во Бејрут. 

Тие се гневни на власта поради експлозијата во која загинаа повеќе од 150 лица.

Неколку луѓе се повредени во текот на протестот во близина на зградата на парламентот. 

Медиумите објавија и дека револтот кај граѓаните е и поради писмо од експерт кое во 2017 година е испратено до властите како предупредување дека поради хемиските суптанци во складиштето може да настане експлозија, но тие не реагирале.

Францускиот претседател Емануел Макрон, го посети главниот град и истакна дека во Либан е потребно да се видат длабоки промени од власта.

Тој повика и на меѓународна истрага за катастрофата. ОН пак бара независна истрага за експлозијата.

Лидерот на проиранската група Хезболах, Хасан Насралах ги отфрли обвиненијата дека неговата група го контролирала пристаништето во Бејрут, кое е уништено од катастрофалната експлозија претходно оваа недела.

Претседателот на Либан, Мишел Аун денеска отфрли можност за меѓународна истрага за разорната експлозија во бејрутското пристаниште.

Либанските власти притворија 16 луѓе во истрагата за експлозијата во бејрутските пристанишни складишта, јави вчера државната новинска агенција ННА.

Големата експлозија во складиштето со амониум нитрат во пристаништето во Бејрут кое однесе најмалку 157 животи и рани повеќе од 5 илјади луѓе, беше, според досегашните сознанија, несреќен случај.