Теменугов: Буџетот е растегнат како мрсулче

Добивај вести на Viber

Ако сака вистински, а не ПР или популистички мерки, Владата треба да осигура владеење на правото. Значи, брзо откривање и брзо казнување на прекршителите на Законот за ДДВ и ова да важи на целата територија на државава, вели Горан Теменугов, уредник во Алсат М телевизија. Владата вчера најави дека почнува мерката за поврат на 15 отсто од ДДВ за граѓаните, а едно четиричлено семејство ќе може да оствари поврат на ДДВ од најмногу 28.800 денари годишно. Теменугов тврди дека има амбивалентен став кон оваа мерка - како исполнето предизборно ветување, ама и со променета суштина од чисто социјална мерка до таква со која граѓаните ќе придонесат за намалување на даночната евазија.

„Добро е што едно програмско ветување се реалзиара. Гласано е за него и е познато. Но, дали е добро. Прво, во програмата на СДСМ стои дека ќе се вратат кај граѓаните 130 милиони евра годишно. Вчера од министерот за финансии слушнавме дека планот е да се вратат околу 50 милиони евра. Од ветеното исчезнаа 80 милиони. За мене, ова и не е толку лошо, бидејќи почнаа да го растегнуваат буџетот како дете мрсулче. Ако се вратиме на генезата како оваа мерка стана дел од програмата, ќе видиме дека првичната идеја беше тоа да биде чисто социјална мерка, односно после кризата од 2008 – 2009 година, СДСМ со ова сакаше финансиски да им помогне на осиромашените граѓани. Со текот на времето, оваа идеја се надогради и граѓаните би станале неформални инспектори околу тоа каде се издава, а каде не фискална сметка, со што би се намалила сивата економија. Ваквиот мотив за мене не држи вода. Ми кажува дека институциите се немоќни за да се справат со сивата економија која е проценета на над 30 отсто од БДП, вели Tеменугов.

Затоа, тврди вистински мерки се тие кои ќе осигураат владеење на правото.

„Значи, брзо откривање и брзо казнување на прекршителите на Законот за ДДВ и ова да важи на целата територија на државава. Затоа, за оваа мерка имам амбивалентен став, заклучува Теменугов.

А.Т.