СВЕДОЦИ КАЖАА: Боки 13 купувал мебел, но не го платил

Добивај вести на Viber

Бојан Јовановски кој е обвинет во случајот „Рекет“, ниту го платил, ниту дал компензација за лускузниот мебел. 

Лидија Младеновиќ, управителка на „Зона текс“ и „Зона мебел“ на денешното рочиште за „Рекет“ изјави дека не го познава лично првообвинетиот во случајот Јовановски и дека зборувала со него само на телефон.

„Знаев дека Јовановски одбрал мебел за телевизијата, но дека ќе го компензирал со реклами. Сумата беше голема, не можеше сè со компензација. Вкупниот долг што требаше да го плати, што не беше компензација, изнесуваше 296.000 денари. Ние не знаевме за каде му е мебелот. Договорот што го потпишавме не беше испочитуван. Ни компензација, ни плаќање на ратите за мебелот. Му пративме опомена пред тужба, па девојка дошла и оставила 2.750 евра како гаранција дека долгот за мебелот ќе се плати. Станува збор за долг за кожена аголна гарнитура, две кожени фотелји и масичка од брендот „калигарис“ – рече Младеновиќ.

Таа изјави дека се потпишани два договори. Прво бил одбран мебел за телевизијата на Бојан, 1 ТВ. Со другиот договор е одбрана кожна гарнитура со две табуретки.

При претресот кај Јанева е одземена гарнитура. Бранителката на Катица Јанева, Ирена Фрчкоска, до судот достави каса прими како материјален доказ, која ѝ беше предочена и на Лидија.

Продавачката Весна Костовска од салонот „Пјер Карден Хоум“ за луксузен мебел и теписи, сведочеше дека обвинетиот Јовановски купил само ТВ-комода.

При претресот кај Јанева пред да биде притворена, е одземена гарнитура како доказ, под сомневање дека ја примила како поткуп од парите на пријавувачот Орце Камчев што му ги дал на Јовановски како рекет, за ослободувањето од притвор и давање времен пасош од Јанева во истрагата за „Империја“.

Судењето ќе продолжи утре со изнесување материјални докази.

За случајот „Рекет“, Зоран Милески Кичеец доби 3 години затвор, откако призна вина, а на екс обвинителката од СЈО, Катица Јанева и Јовановски им се суди.