Судијата-поротничка во „ТНТ“ си поднесе оставка, судењето почнува од почеток
Објавено во: Македонија 13 Јануари, 2020
Судијата-поротничка Лилјана Ивановска-Кочковска, која изминатиот период беше цел на закани и јавно препукување помеѓу Кривичен суд и одбраната на обвинетите во случајот „ТНТ“, денеска по втор пат си поднесе оставка, овој пат на самото рочиште по што предметот за насилното рушење на „Космос“ започнува од почеток. Следното судење е закажано за утре.
Ивановска-Кочковска, која веќе има навршено 60-години, се обратила пред судот и поднесе неотповиклива оставка, а како причина за тоа наведе дека има здравствени проблеми, потврди на денешното рочиште судијата Огнен Ставрев по што истото беше прекинато.
Изминатите денови адвокатите на обвинетите - поранешниот градоначалник на Гази Баба, Тони Трајковски, и поранешниот министер за транспорт и врски Миле Јанакиески, бараа одново судење поради тоа што поротничката го исполнила условот за пензионирање. Кривичниот суд ова го протолкува како закана кон Ивановска-Кочковска, а адвокатите ги пријави во Адвокатска комора и за нив оцени дека го кочат судскиот процес.
„Одбрана и обвинети, тврдевте дека ова не го правите поради одоговлекување на постапката, ниту нејзино запирање, ако е така, потврдете се себеси, ќе ја почнеме постапката одново, меѓутоа да не почне макотрпно како досега, туку со читање на сè што беше изведено”, рече Ставрев.
Кривичлен суд веќе еднаш претходно ја убеди Ивановска Кочкова да не го прекинува мандатот. Во преписката со одбраната беше наведено дека одлуката за нејзиниот престанок на функцијата треба да ја донесе Судскиот совет. Од таму велат сметаа дека „ТНТ“ треба да заврши во разумен рок и дека тоа може да биде одложено бидејќи таа е активен учесник во процесот.
Адвокатот Јовица Страшевски претходно го извести судот дека нема да дојде на рочиштето, односно дека земал годишен одмор.