Специјална комисија ќе гони нарушувања на референдумот

Добивај вести на Viber

Основното јавно обвинителство на Македонија формира специјална комисија која ќе ги следи евентуалните прекршувања пред, за време и по референдумот на 30 септември за гласање за Спогодбата од Преспа. Истата брзо ќе ги известува единиците и ќе бара од нив ажурно да реагираат на кривичните прекршувања од Глава шеснаесет со итна постапка и експресно формирање на предмет.

Јавниот обвинител Џељаљ Бајрами е назначен за претседател на Комисијата, а има уште по еден јавен обвинител од четирите Виши јавни обвинителства.

„Проактивното и превентивно делување на Јавното обвинителство со формирањето на привремената Комисија  е одговор на  ставот дека настаните поврзани со претстојниот референдум се од поширок општ интерес во јавноста, каде има потреба од поголема организираност  во насока на заштита од криминални или други противзаконски дејствија“, гласат од ОЈО.

Иако комисијата ќе ја следи ситуацијата на дневна основа, од таму ја повикуваат јавноста, граѓанските организации, други организации, политички партии, домашни и меѓународни институции и сите субјекти кои сметаат дека се прават нарушувања на  со организирањето и спроведувањето на референдумскиот процес, да достават поднесок/пријава до Комисијата на електронската адреса - referendum@jorm.gov.mk.