СИЛНО ВЕТУВАЊЕ - Мицковски се обврза дека ќе донесе бесплатен гас до секое семејство
Објавено во: Македонија 22 Февруари, 2020
Целосна гасификација на земјава, како и бесплатен приклучок за секое семејство во државата. На ова денеска пред граѓаните се обврза лидерот на ВМРО-ДПМНЕ, Христијан Мицкоски.
Според него, гасификацијата ќе биде еден од стратешките приоритети на ВМРО-ДПМНЕ, а владата која ќе ја предводат ќе воведе природен гас за употреба во домаќинствата, индустријата, малите и средните претпријатија, образованието, социјалните установи, здравствените установи итн.
„Затоа ќе го изградиме гасоводниот систем во државата. Во наредниот период со интензивна динамика ќе се пристапи кон: завршување и пуштање во употреба на проектите кои беа започнати од поранешната влада на ВМРО-ДПМНЕ, а еве гледаме на крајот од мандатот на оваа влада не се сеуште завршени. Изградба на магистралниот гасовод Неготино - Кавадарци – Битола т.е. доизградба како и доизградба на магистралниот гасовод Скопје - Тетово – Гостивар, кој што е започна и првиот и вториот проект и обезбедено финансирањето од претходната влада на ВМРО-ДПМНЕ. Понатаму изградба на магистралниот гасовод Штип - Радовиш- Струмица – Гевгелија. Изградба на магистралниот гасовод Гостивар – Кичево. Изградба на магистралниот гасовод Свети Николе – Велес. Изградба на магистралниот гасовод Битола - Ресен - Охрид – Струга. Поврзување на ТЕЦ Неготино на природен гас и напуштање на оној за прв пат во историјата познат термин енергетско земјоделски комбинат кој што ниту е енергетски, ниту е земјоделски и гледаме дека само претставува споменик на едно неуспешно време на владите на СДСМ. Изградба на делници за поврзување на Технолошко-индустриските развојни зони во Штип, Прилеп, Тетово, Радовиш, Струмица, Кичево, Струга, Гевгелија, како и Индустриската зона Жабени“ изјави Мицкоски
Мицкоски потенцираше дека ќе се обезбеди природен гас за секое семејство во Македонија, а тоа подразбира и во населените места кои се подалеку од примарната мрежа и додаде дека граѓаните ќе бидат ослободен од трошоците за приклучок на овој енергенс.