ШТЕДАЧИТЕ СО ОСТАР НАПАД КОН ГУВЕРНЕРКАТА - дали транспарентност е прво да изјавите дека заштедите се безбедни, а потоа да ја затворите банката

Според нив, гувернерката Бежоска знаела и била свесна за лошата состојба во банката со години, но ништо не направила за да го спречи криминалот и да ги заштити од пропаѓањето на нивните доверени лични средства. 

„Што правела гувернерката Бежоска кога мерките не се почитувале ниту исполнувале од раководните лица во банката!? Ги оставила да продолжат да крадат!!! Дали гледањето слепо и дозволувањето да се случува континуиран грабеж во банка е професионализам, и тоа врвен!? Дали е професионализам да ја затворите банката без да се обидете да воведете администрација и да ја спасите истата од пропаст? За да го направите тоа треба и знаење, одговорност, труд и работа, а сето тоа за жал го нема во сегашното раководство на Народна банка. За независноста на Народна банка не знаеме доволно. Тоа ќе го оставиме на гувернерката Бежоска да одговори и разјасни зошто Еуростандард банка се затвори во сред пандемија и веднаш после одржаните парламентарни избори оваа година, а не пред тоа кога веќе било јасно каква е состојбата на банката. Транспарентноста е многу слаба страна на Народна банка и гевернерката Бежоска. Дали транспарентност е јавно да изјавите дека депозитите на граѓаните се безбедни и дека може да се чувствуваат мирно бидејќи се заштитени од системот!? За веднаш потоа истата таа личност која јавно го изјавува тоа, гувернерката Бежоска, да ја затвори банката и наеднаш пропаднат речиси 60 милиони евра од континуираниот грабеж дозволуван од Народна банка со години. Ова не е одлика на транспарентност, ова е одлика на недолична манипулација и свесно лажење на гувернерката Бежоска“, стои во соопштението на штедачите.

„Транспарентоста на гувернерката Бежоска се огледа и во избегнувањето на разговор и соочување со оштетените депоненти, граѓани и фирми, на дебата односно одговор на нивните прашања, а дел од нив се поставени и овде но никогаш не добивме конкретен и транспарентен одговор. Скапо платен од нашите пари и заштитен од државата, раководниот тим на Народна банка а пред и се гувернерката Бежоска, продолжуваат со својот стил на паушални одговори без суштина и цел. На нас оштетените ни е многу јасно дека не може да очекуваме никаков конкретен одговор од гувернерката Бежоска бидејќи таа е соучесник во криминалот во банката и секакво нејзино признавање на делото преку изнесување на вистината може да биде штетно за неа. А ние оштетените, ќе се снаоѓаме со нашите животи и понатаму, ограбени, понижени и излажани во сред пандемија, но никогаш нема да се откажеме од вистината и правдата. Се надеваме и дека ќе дојде време кога гувернерката Бежоска и нејзниот тим ќе се посрамотат и ќе одговараат за своите штетни постапки во овој организиран криминал коишто директно оставија 3.000 семејства без своите тешко заработени и заштедени лични средства, со што го уништија сегашниот и иден живот на обичните граѓани и фирми и нивните семејства“, се наведува во соопштението.

„Не вршеа контрола и не направија ништо кога се крадеше во банката, а сега ќе ја контролираат стечајната постапка односно проневерата на нашите пари. Толку од професионализмот, независноста и транспарентноста на Народна банка и гувернерката Бежоска. Се до затворање на следната банка“, наведуваат огорчените штедачи.