Штедачите од Еуростандард ќе одат „на гости“ пред Народна банка - СЕ ДО ЦРНАТА СРЕДА И НИЕ ГО СЛАВЕВМЕ ДЕНОТ НА ШТЕДЕЊЕТО
Објавено во: Финансии 28 Октомври, 2020
Оштетените штедачи од Еуростандард банка повторно ќе го изразат својот револт против институциите, кои, како што велат, ги довеле во незавидна ситуација.
Протестот има и симболичен датум, а тоа е петок, 30 октомври, на еден ден пред Светскиотден на штедењето.
А како локација каде ќе протестираат, ја избрале Народна банка.
Еве што напишаа штедачите во своето последно соопштение до јавноста.
„Следствено на нашите досегашни објави до медиумите каде почнавме со јавно прикажувње на криминалот направен врз нас како дел од пропаѓањето на Еуростандард банка, би сакале со овој текст и воедно да ја известиме јавноста за нашиот втор протестен собир кој овој пат ќе го одржиме пред зградата на еден од главните виновници за ситуацијата во која се наоѓаме, а тоа е никој друг него Народната Банка, пишуваат штедачите.
Нивниот протест, како што велат, ќе биде со почеток во 15 часот на 30 октомври или ден порано од светскиот ден на штедењето, 31 Октомври.
„Тој ден, се до црната за нас среда, 12 август, беше и наш празник, кој гордо го славевме како депоненти во овој наш банкарски систем регулиран од НБРМ, институција која еве не натера место да празнуваме да протестираме против криминалот направен над нас“, велат штедачите.
Воедно, ги повикуваат на поддршка сите граѓани кои досега биле оштетени на било кој начин од овој наш банкарски систем, „да им се придружат во борбата за правата на штедачите во целост, како и сите граѓани кои сакаат да живеат во праведно општество кое е регулирано од институции кои работат во интерес на граѓаните а не на криминалците“.
„На 30 октомври ќе протестираме, а на 31 октомври ќе мечтаеме дека еден ден доколку проработи правниот систем и совеста на политичарите, и ние ќе славиме повторно.
Воедно би сакале јавно да се заблагодариме на политичките партии кои јавно не подржаа во нашата цел за докажување на криминалот направен врз нас преку закажување на Надзорната расправа во Сообранието, како и за идното поднесување на предлог законот за наше целосно обештетување и воедно конечно расчистување со криминалот во банкарскиот систем и вадење на криминалците пред лицето на правдата. Борбата продолжува за вистината и правдата!“, пишуваат штедачите воп својот допис до медиумите.