Се враќа публиката на спортските натпревари во Македонија?
Објавено во: Македонија 10 Мај, 2021
Утре на владина седница се очекува да се расправа за враќањето на публиката на стадионите и спортските сали, откако во денешната препорака од Комисијата за заразни болести беа дадени нови препораки до Владата на РСМ, која на следната седница ќе треба да се изјасни за нив.
„Организирање на настани на отворено и затворено со почитување на протоколите од 2020 година, односно присуство на 30 % од целосниот капацитет“., гласи една од одредбите која денеска ја објави Кризниот штаб.
Во одредбата не се наведува дека станува збор за спортски натпревари, па затоа се очекува Владата на својата утрешна седница да даде и конкретна одлука, со надеж дека ќе биде дадено зелено светло за враќање на навивачите на трибините.
Први настани кои ќе добијат зелено светло за публика на трибини пред завршувањето на тековната сезона би биле завршните турнири од Купот на Македонија во ракомет и во кошарка.
Останува да се види и дали Владата ќе даде препорака да се дозволи и да се продолжи со тренинзи на младинските екипи.