СЕ УРНА ЦЕНАТА НА НАФТАТА НА СВЕТСКИТЕ БЕРЗИ - колку денеска кај нас ќе поевтинат горивата

Добивај вести на Viber

Огромен пад на цените на нафтата. Светските медиуми јавуваат дека цената на американската нафта утрово падна на близу 20 долари за барел веднаш по отворањето на пазарот, што е близу до најниското ниво во последните 20 години.

Американската референтна вредност, позната како Вест Тексас Интермедиејт достигна вредност од 20,6 долари за барел и падна за повеќе од шест проценти. Брент, меѓународна референтна вредност, падна за шест проценти, достигнувајќи вредност од 23,03 долари за барел, што е најниска цена од 2002 година.

Цените на нафтата паднаа за повеќе од половина во изминатиот месец со затворање на пазарите во Европа и Северна Америка, што ја намали побарувачката за нафта.

А денеска се очекува Регулаторната комисија за енергетика да одреди нови цени на горивата, со оглед што таа секој понеделник ги утврдува цените на нафтените деривати во земјава, врз оснива на движењата на цените на светските берзи од претходната недела.

Новите цени на горивата веќе напладне ќе и бидат соопштени на јавноста.

Со оглед што минатата недела паѓаа цените на нафтата, се очекува РКЕ да информира за ново намалување на цените на бензините и дизлелот. 

Пред неколку дена Марко Бислимовски, претседателот на Регулаторна комисија за енергетика, изјави дека до сега во историјата откако е формирано ова тело не е виден ваков пад на дизелот и бензините. Втор пат по ред изминатиот период имаше намалување на горивата, а последниот во просек беше за 9,18 отсто. Според Бисимовски, за големото намалување е заслужна и новововедената методологија на пресметување на цените и маржите кај трговците.

„Ова се моменти кои во историјата на тргувањето со нафтените деривати не се паметат. Нарушениот баланс на понудата и побарувачката поради пандемијата со Ковит 19 донесе силни намалувања на цените и кај нас. Континуираното темпото на  силен тренд на намалување на нафтените деривати е рекордно од кога Регулаторната комисија за енергетика и водни услуги има надлежност да утврдува највисоки малопродажни цени на одделни нафтени деривати.Со денешната одлука повторно драстично ги намаливме цените на нафтените деривати што е потврда дека Методологијата по која се формираат цените на нафтените деривати ги штити интересите на потрошувачите“, рече Бислимовски.