Само што започна, веднаш се одложи рочиштето за 27 април
Објавено во: Македонија 21 Февруари, 2020
Судското рочиште за обвинетите како организатори на насилствата од 27 април во Собранието е одложено за 26 февруари, откако одбраната на Тпоранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиески и Спиро Ристовски, како и поранешниот директор на УБК, Владимир Атанасовски, се пожали дека немале увид на сите докази.
Сите обвинети беа присутни на рочиштето. Судот сите докази од предметот ќе им ги достави на компакт диск. Судскиот процес го води судијата Илија Трпков, а застапник на обвинението е Вилма Русковска.
Според ОЈО, осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел, ги организирале и материјално ги поддржале масовните протести, најпрвин пред Државната изборна комисија, а потоа и протестите на движењето „За заедничка Македонија“ кои кулминираа со насилното влегување во Собранието на 27 април.
Одбраната на организаторите на крвавиот упад во Собранието, чие судење почна денеска, достави низа барања за докази. Вељаноски, побарал да се одложи рочиштето бидејќи поканата му стигнала на 17 февруари па немало доволно време да се подготви одбраната, додека пак Јанакиески достави ЦД со изјава од Собранието на пратеникот Крсто Мукоски како доказ.
Поднесоци адвокатите поднесувале до вчера, иако рочиштето беше закажано уште во јануари. Како докази се побарани и сите забелешки од УБК, кои се однесувале на операцијата ,,платформа”.