САД РАЗОЧАРАНИ: Порачаа да градиме транспарентно и демократско општество
Објавено во: Македонија 19 Октомври, 2019
САД се разочарани затоа што Европскиот совет не додели датум за преговори за Македонија и за Албанија. Ги охрабруваат двете држави, Македонија и Албанија да останат цврсти во градењето на транспарентно и демократско општество.
Стејт департментот наведува дека Албанија и Македонија, направиле важни реформи и се надеваат дека Европскиот совет ќе постигне консензус за позитивна одлука пред самитот ЕУ-Западен Балкан наредната година.
„Соединетите Американски Држави ја поддржуваат посветеноста на Македонија и Албанија за интеграцијата во Европската унија. Разочарани сме што Европскиот совет не ги прифати силните реформски напори на секоја земја. Позитивната одлука би го потврдила кредибилитетот на нивниот пат кон ЕУ и цврсто ќе се спротивстави на малигните надворешни актери, кои сакаат да ги поткопаат западните вредности и евроатлантската заедница. Признаваме дека Европскиот совет не кажал „не“ ниту на Албанија, ниту на Северна Македонија, ниту ЕУ воспостави нови услови за започнување на пристапните преговори. Се надеваме дека Европскиот совет ќе постигне консензус за позитивна одлука за двете држави пред самитот ЕУ-Западен Балкан следниот мај“, соопшти Стејт департментот.
САД ќе продолжат да работат со европските партнери за да ги унапредат споделените цели за стабилност и безбедност на Западен Балкан“, се наведува во соопштението на Стејт департментот.