Ројтерс: Франција се спротивставува на разговорите за членство во ЕУ со Северна Македонија и Албанија
Објавено во: Македонија 10 Октомври, 2019
Франција им дала сигнал на останатите земји-членки на Европската унија оваа недела дека засега е против започнување преговори за членство со Северна Македонија и Албанија, изјавија дипломатски извори за Ројтерс, фрлајќи сенка врз амбицијата на земјите да се интегрираат со Западот.
Повеќе од половина од 28-те земји-членки на ЕУ, како и нејзините највисоки претставници во Брисел вршат притисок да се наградат двете балкански држави за реформите со тоа што се согласија да започнат разговори за пристапување, пишува Ројтерс.
Тие предупредуваат дека Русија, Кина или Турција ќе го искористат стратешкиот вакуум во проблематичниот регион доколку ЕУ не успее да задржи опипливи изгледи за тамошните земји.
Според Париз, ЕУ сега се соочува со премногу предизвици за да преговара со уште две држави од Балканот, а регионотсè уште се бори со криминал и корупција. Франција вели дека ЕУ треба прво да се реформира одвнатре заради поголемо единство за климатските промени и миграцијата, и дека двете земји треба да обезбедат дополнителни реформи пред да бидат одобрени разговорите.
„Тие сè уште не се таму. Бараме од нив да направат дополнителни напори “, рече француски официјален претставник. „Преговорите не можат да се отворат во октомври 2019 година, ќе треба да ја преиспитаме ситуацијата некаде во 2020 година.“
Едногласност меѓу 28-те земји-членки е потребно да започнат преговори за пристапување.
Министрите на ЕУ повторно ќе разговараат за ова прашање во вторникот во Луксембург, пред националните лидери да се состанат во Брисел на самитот на 17 и 18 октомври. Овој потег веќе беше одложуван повеќепати.
„Ова е многу фрустрирачко за повеќето земји-членки. Нашиот кредибилитет е доведен во прашање “, рече дипломат од земја која е подготвена да ја отвори вратата за кандидатите од Западен Балкан.
„Северна Македонија и Албанија направија многу. Да, треба да се направат уште многу, но започнувањето на разговорите за членство е само првиот чекор, процесот ќе трае со години и тие ќе мора да ги исполнат сите критериуми пред да бидат внесени“.