„Рекет“ без новинари на барање на Рускоска: Јанева и Боки 13 протестираа

Добивај вести на Viber

Обвинителката Вилма Рускоска побара, а судијата Васка Николовска Масевска прифати на денешното рочиште за случајот „Рекет“ новинарите да не ги слушаат снимките од УСБ -то на осудениот Зоран Милевски-Кичеец, бидејќи „се споменуваат луѓе чиј углед може да биде нарушен“.

Рускоска ова го побара откако претходно обвинетиот Бојан јовановски најави дека овие докази ќе ја „отворат Пандорината кутија“.

Барањето на Рускоска наиде на реакција кај Јовановски, како и кај поранешната специјална обвинителка Катица Јанева, исто така обвинета во „Рекет“, кои инсистираа  јавноста да остане за да ги слушне снимките.

-Барам да биде оставена јавноста за да се спречат било какви шпекулации за тие снимки, во интерес на јавноста. Вие го имате последниот збор, но во овој случај се изнаслушавме шпекулации за мене и за мои блиски чиј углед беше нарушен. Сметам дека образложението на обвинителката не е издржано, рече Јовановски.

Јанева пак реагираше дека јавноста не била исклучена кога се изнесувале докази кои ја дискредитирале неа лично.

Рускоска претходно рече дека прикажувањето на разговорите од УСБ-то на Кичеец е непотребно одолговлекување на постапката, но дека ќе се слушнат во судницата за да нема сомневање за задни намери.