Рахиќ: Јанева е во посебен одел во Истражниот Затвор Скопје

Добивај вести на Viber

„Госпоѓа Катица Јанева не е во женско одделение, таа е во еден посебен оддел каде што според безбедносната проценка на затворската управа има друг третман, од безбедносен здравствен и секаков друг аспект“, истакна директорот на Истражниот затвор Скопје во Шутка, Есад Рахиќ, во неделното интервју за Радио Слободна Европа.

Директорот рече и дека Специјалната Јавна обвинителка е само во посебниот одел во Шутка, поради тоа што станувало збор за личност која била специјален јавен обвинител, за да се направи комплетна безбедносна и здравствена проценка и госпоѓата да биде сместена на адекватно место.

Исто така, тој истакна дека како институција се ограничени со тие сместувачки капацитети.

„Ние имаме три одделенија и за жал после подолго време, прв пат во историјата на притворот и на затворот се случува да имаме некаде околу 18-20 жени, најмногу имало по 3-4. Тоа се поголеми одаи, да не речам ќелии, во кои има по 4,5 или 6 жени. Малку е незгодно, има разни профили на жени внатре, имате женски лица судени за убиство, имате за изнуда и малку е тешко да вклопите еден таков профил како госпоѓа Јанева меѓу тие лица, но ние си ја вршиме нашата работа, така што таа е сместена на најдобар начин на кој што можеме да го направиме“, вели Рахиќ.

Тој исто така во неделното интервју за Радио Слободна Европа рече дека во моментот во Хашкото одделение се сместени дваесетина притвореници, од кои еден или двајца се ВИП личности.