Работните активности на булеварот „Александар Македонски“: Протокот на возила е овозможен само на една коловозна лента
Објавено во: Македонија 16 Јануари, 2022
Во текот на денешниот ден, генералниот директор на ЈП Водовод и канализација – Скопје, Златко Перински направи увид на работните активности во изведба на екипите на претпријатието за отстранување на дефектот на водоводна цевка ф-600 на бул. Александар Македонски, кај Кремисимо, информираат од јавното претпријатие.
За поголема ефикасност во изведбата на работните активности, две коловозни ленти на булеварот се затворени. Протокот на возила е овозможен само на една коловозна лента.
Појаснуваат дека врз основа на планот за работа, не се очекува прекин во водоснабдувањето. Но во случај да дојде до непредвидени проблеми, со прекинато водоснабдување ќе бидат корисниците на општина Гази Баба, Автокоманда, Ченто, Сингелич, Стајковци, Инџиково, Маџари, Хиподрум и хотел Белви.
-Одлуката да се изведат овие работни активности денес, е токму заради местоположбата и затвoрањето на дел од булеварот. Екипите на Водовод и канализација - Скопје, ќе бидат на терен до целосно отстранување на дефектот и ставање во употреба на водоводната мрежа за граѓаните, велат од ЈП Водовод и канализација.
Оттаму посебно нагласуваат дека со отстранување на овој дефект водоводната мрежа ќе биде ставена во употреба за граѓаните, во тој дел на градот, без понатамошни потешкотии и застои во водоснабдувањето.