Принцот од Саудиска Арабија го хакирал телефонот на Џеф Безос
Објавено во: Свет 22 Јануари, 2020
Саудискиот принц го хакирал мобилниот телефон на најбогатиот човек на светот.
Престолонаследникот принцот Мухамед бин Салман го „хакирал" мобилниот телефон на официјално најбогатиот човек на светот и сопственик на Амазон, Џеф Безос, пишува британски Гардијан.
Гардијан пишува дека мобилниот телефон на Безос е хакиран со енкриптирана порака на Ватсап, која е испратена од личниот број на принцот.
Пораката содржела злонамерен софтвер (малвер) кој се инфилтрирал во мобилниот телефон на Безос.
Според оваа експертска анализа, „многу е веројатно“ дека мобилниот телефон е хакиран со помош на инфицирано видео испратено до Безос од бројот на саудискиот принц.
Безос примил злонамерна порака среде пријателска размена на пораки со принцот, изјавил извор за Гардијан. Само неколку недели порано, Безос и Бин Салман биле на вечера во Холивуд со холивудскиот продуцент Брајан Грејзер, во рамки на дипломатско-економската турнеја на принцот во САД, каде се сретнал со сите, од претседателот Доналд Трамп до Безос, Марк Цукерберг и Опра Винфри.
Од мобилниот на Безос е извлечена голема количина на податоци, но не се знае точно какви. Сето тоа се случило на 1 мај 2018 година.
Саудиска Арабија и претходно веќе негирала дека го хакирала мобилниот телефон на американскиот милијардер, од кој се протечени пораки и фотографии што Безос ги разменувал со љубовницата Лорен Санчез, поради кои конечно се развел од сопругата Мекензи, што американските медиуми го опишаа како еден од најскапите разводи во историјата.