Претседателот на ДИК го искритикува СДСМ за „персоналецот“
Објавено во: Македонија 17 Јануари, 2020
Претседателот на Државната изборна комисија Оливер Дерковски ја искритикува Владата за персоналниот данок. На фејсубук-статус кој Дерковски го објави синоќа тој напиша дека треба да се вратат парите, а не само да се „извинуваат“ за тоа што го вовеле прогресивното оданочување.
„Помина 2019 година, си го зголемија персоналниот данок си собраа пари колку што им требаа за трошење и после тоа само едно извинете згрешивме и си ја завршија работата како ништо да не било, абе да им ги вратите парите на луѓето не може да помине тоа само со раката на срце и извинете, напиша Дерковски.
Тој е претседател на ДИК од 2018 година. Тој и сите членови на Државната изборна комисија ги избри Собранието по претходен политички консензус. Дерковски дојде на предлог на ВМРО, по одржана лидерска средба, а според надлежностите, функцијата треба да ја врши професионално.
Државната изборна комисија е составена од седум членови претседател, потпретседател и пет други членови. Нивниот мандат е четири години, а се избираат во рок од 60 дена од денот на одржувањето на конститутивната седница на Собранието на Република Македонија. Политичките партии во опозиција предлагаат претседател и двајца членови на ДИК, a партиите на власт предлагаат потпретседател и тројца членови на ДИК. Сите нив ги избира Собранието со двотретинско мнозинство гласови од вкупниот број пратеници. Кандидатите за членови на ДИК треба да бидат државјани на Македонија со постојано место на живеење во земјата, да се дипломирани правници со најмалку осум години работно искуство како правници и да не бидат членови на орган на политичка партија.