ПОШТА СЕ ПРАВДА ЗА ФРАПАНТНИТЕ 280 ВРАБОТУВАЊА - имале одлив на кадри
Објавено во: Економија 14 Февруари, 2020
Пошта се правда за фрапантните 280 нови вработувања на неопределено време, за кои институцијата распиша оглас. Велат дека тоа е неопходно заради одливот на кадар од Поштата, и дека овие лица досега биле ангажирани со договор на услуга, а на претходниот конкурс во октомври не биле примени, па сега се примаат, со цел да се обезбеди квалитетна услуга за корисниците.
„Имајќи предвид дека основната
дејност на Пошта на Северна Македонија како назначен давател на поштенски услуги на
целата територија на Државата е достава на сите видови на поштенски пратки, а заради
одлив на пошторазнесувачи по различни основи, Компанијата распиша оглас за
вработување на 280 пошторазнесувачи.
Овој број на пошторазнесувачи во изминатиот период беше ангажиран со договор за услуга – договорен пошторазнесувач и не беше опфатен со последниот конкурс кога беа примени 80 шалтерски работници .
Неопходноста од прием на пошторазнесувачи е со цел, да се обезбеди давањето на универзалната поштенска услуга како услуга од јавен и економски интерес на целата територија на државата со утврден квалитет и пристапни цени за корисниците“, се вели во одговорот од Кабинет на генералниот директор во Пошта, Ејуп Рустеми, кој е на службен пат.
Рустеми доаѓа од редовите на ДУИ, а Фактор го праша и дали не е спорно пред избори да има ваков голем број на нови вработувања во оваа државна институција, но на тоа прашање не добивме одговор.
Фактор дојде до огласот, па го објавивме за читателите.
Ова не е прво вработување во Пошта. Во октомври лани беше распишан оглас за 80 нови вработувања, а директорот Рустеми тогаш ни изјави дека тие вработувања биле неопходни, бидејќи Пошта ја напуштиле многу вработени, што по основ на пензионирање, што по други основи.
Н.Н.Ф.