Попушта ли Германија пред налетот на пандемијата?

Добивај вести на Viber

Медицинските центри во покраината Северна Рајна-Вестфалија во Германија бараат итно да биде испорачана медицинска заштита опрема, во спротивно, здравствениот систем во покраината би доживеал целосен крах.

Весникот „Билд“ денеска објави документ од Кризниот штаб на покраината, во кој е наведено дека се заканува колапс ако и понатаму се чека на испорака на заштитната опрема што недостасува. Во документот пишува:

„Сите градови и окрузи пријавуваат проблеми со набавка на заштитна опрема и средства за дезинфекција. И не само лекарите и клиниките, туку и Итната помош, како и центрите за нега на стари лица имаат сериозен проблем со недостиг од заштитна опрема“.

Карл-Јозеф Лауман, покраинскиот министер за здравство, појаснува дека биле нарачани огромни количини на заштитна опрема, но, како што вели, главна причина за моменталниот недостиг е отежнатото производство, но и испорака поради вонредните мерки што ги воведе германската влада. Инаку, покраината Северна Рајна-Вестфалија е всушност епицентарот на коронавирусот во Германија. Вкупната бројка на инфицирани пациенти со Ковид-19 во цела Германија е речиси 48.000, а починати се 281 лице.